அவளின் நினைவுகளாய்....

 

ஒரு விழியால் உளி சேர் 

உன்னை பார்த்தது உண்மைதான்;

மறுவிழி மறுப்பதுபோல் 

எனை மறைத்துக்கொண்டது பொய்.

நீ அறிந்த எனது பெயர் 

நான் மொழிந்து நீ வழிய ஆசைப்பட்டது உண்மைதான்;

ஆணவமிக்க என் வார்த்தைகளுக்குள் 

எனது பெயரை எனக்குள் மறைத்துக்கொண்டது பொய்.

மெய்யெழுத்தாய் எனை நீ  

தொடர்ந்தது உண்மைதான்;

உன் தொடர்தலின் தொடர்தலுக்கு முற்றுப்புள்ளியாய்

உனை முறைத்தது பொய்.

உனது ஆசை வார்த்தைகளுக்குள் 

நான் ஆழ்புதைந்தது உண்மைதான்;

அர்த்தமற்ற என் சந்தேகத்திற்குள் 

உனை ஆழ்புதைத்தது பொய்.

நீ உன் காதலுக்குள் என்

நட்பை மறந்தது உண்மைதான்;

நான் என் நட்புக்குள் உன்

காதலை கரைக்க நினைத்தது பொய்.

என் உறவுமுறைக்காக என்னிடம் 

நீ முறையிட்டது உண்மைதான்;

அந்த உறவு முறிக்க நான் 

உன் உறவையே முறிக்க நினைத்தது பொய்.

எப்போதாவது உன்னிடம் பேசிக்கொள்ள 

அப்போது பிரிந்தது உண்மைதான்;

எப்போதுமே உனை நினைக்ககூடாது 

என நினைத்துக்கொண்டிருப்பது பொய்...